मरेर बाँच्ने कुरा

शब्द : नाकिमा
संगीत/स्वर : भीमसेना राई

सुन है सुस्तामा छिमेकी नाच्ने कुरा
बुझ है माटोलाई मरेर बाँच्ने कुरा

सिक्किम, टिस्टा हाम्रै हो तर 'थियो' भयो
कालापानी उसैलाई दियो, लियो गयो
सोच है नेपाली सिमाना जाँच्ने कुरा
बुझ है माटोलाई मरेर बाँच्ने कुरा

तिनीसँग बन्दुक छन् हामीसँग मुठी
सहिदका रगतहरु थोपा-थोपा जुटी
आँट है मुठीले बन्दुक भाँच्ने कुरा
बुझ है माटोलाई मरेर बाँच्ने कुरा

पुग्नु टाढा छ

शब्द : नाकिमा
संगीत : सन्तोष दुमी
स्वर : भीमसेना राई, सन्तोष दुमी

घामले आँखा खोलिसक्यो
पाखा-पर्वत चुमिसक्यो
उठ ए मान्छेहरु
पुग्नु टाढा छ ।

पीठो-गुन्द्रुक उमालेर
टार्नु कति छाकहरु
पटुकीले पेट कसेर
काट्नु कति रातहरु
जून घुम्न आऊ भन्छ
सपनीमा जूनवासी
घामले आँखा खोलिसक्यो
घरको संघार टेकिसक्यो
उठ ए युवाहरुपुग्नु टाढा छ ।

कुचीतिर अघि बढाऊ
कुचो लाउने हातहरु
कलमले कहानी फेर
जाँगरीला जमातहरु
अनि पो त पुग्छौं हामी
चन्द्रमाको हाट हेर्न
घामले पाइला चालिसक्यो
नयाँ यात्रा थालिसक्यो
उठ ए यात्रीहरु
पुग्नु टाढा छ ।

झुल्कदैछ सुन्दर बिहानी

शब्द : नाकिमा
संगीत : भीमसेना राई
स्वर : भीमसेना राई, हेम राई, शर्मिला श्रृजु, तारा राई

हजार साँझ अस्ताएर झुल्कदैछ सुन्दर बिहानी
किन बस्छौ रोई रोई जन्मदैछ हाम्रै सपनी

छ रे एउटा बुढो रुख तिम्रो बारीछेऊ
दियो त्यसले धेरै सेप अब ढालीदेऊ
कालो रात झरेपछि पलाउँदैछ रातो किरणी
किन बस्छौ रोई रोई जन्मदैछ हाम्रै सपनी

हान्या होला जरा धेरै खनी-खनी खोज
कोदालो या के चाहिन्छ तिमी आफै रोज
एउटा कथा सकिएर सुरु भयो अर्को कहानी
किन बस्छौ रोई रोई जन्मदैछ हाम्रै सपनी